Rinumërimi në Tiranë përfundon pa ndryshime në mandate – KAS: Proces korrekt dhe transparent

Procesi i rinumërimit të votave në qarkun e Tiranës ka përfunduar sot, duke mos sjellë asnjë ndryshim në rezultatin përfundimtar të zgjedhjeve parlamentare. Komisioni i Ankimimeve dhe Sanksioneve (KAS) konfirmoi se procesi u zhvillua në mënyrë transparente dhe demokratike, ndërsa theksoi se ndryshimet në vota nuk ndikuan në shpërndarjen e mandateve.

“Procesi nuk solli asnjë ndryshim në rezultat. Ka qenë korrekt dhe i mundimshëm për stafin e KQZ-së”, u shpreh anëtari i KAS, Koli Bele. Ndërkohë, Ledio Braho deklaroi se tashmë nuk ka më vend për akuza për trafikim votash, duke sqaruar se lëvizjet e votave ishin rezultat i gabimeve njerëzore apo çështjeve teknike, e jo manipulimeve të qëllimshme.

Rezultati përfundimtar i mandateve mbetet i pandryshuar:

Partia Socialiste (PS): 19 mandate

Partia Demokratike (PD): 13 mandate

Partia Mundësia: 2 mandate

PSD, Lëvizja Bashkë, Nisma Shqipëria Bëhet: nga 1 mandat secila

Megjithëse u konstatuan ndryshime të vogla në numrin e votave, asnjë mandat nuk u prek. Diferenca më e ndjeshme u regjistrua brenda listës së Partisë Socialiste, mes Olta Xhaçkës dhe Blerina Gjylametit, me vetëm 70 vota dallim.

Humbje të votave sipas partive:

PD-ASHM: -612 vota

PS: -381 vota

Lëvizja Bashkë: -57 vota

Nisma Shqipëria Bëhet dhe Partia Mundësia: -44 vota secila

PSD: -34 vota

Përfitues të lehtë të votave:

Koalicioni Euroatlantik (i drejtuar nga Lulzim Basha)

Koalicioni Djathtas për Zhvillim (i Enkelejd Alibeajt)

Partia Aleanca Kombëtare Shqiptare

Procesi i rinumërimit, sipas KQZ-së dhe KAS-it, shërbeu për të forcuar besimin në sistemin elektoral dhe për të sqaruar të gjitha paqartësitë që ishin ngritur gjatë ditëve të paszgjedhjeve.